Fier – Urgjencat të mbingarkuara, dhjetëra të rinj përfundojnë në spital nga konsumimi i tepërt i alkoolit në dy ditët e para të vitit
Dy netët e para të vitit të ri janë shoqëruar me një fluks të lartë paraqitjesh në urgjencat e spitaleve të Fierit dhe Lushnjës, kryesisht nga të rinj që kanë konsumuar alkool në sasi të tepërta.
Vetëm në Fier, gjatë natës së ndërrimit të viteve dhe asaj të datës 1 janar, në urgjencën e Spitalit Rajonal janë paraqitur rreth 30 shtetas, kryesisht adoleshentë dhe të rinj, me simptoma të intoksikimit nga alkooli. Burime nga urgjenca bëjnë me dije se të gjithë pacientët kanë marrë ndihmën e nevojshme mjekësore dhe më pas janë larguar nga spitali.
Festimet e Vitit të Ri kanë sjellë gjithashtu edhe incidente me lëndë piroteknike. Tre të rinj janë trajtuar në spital pasi kanë pësuar djegie, ndërsa nga fishekzjarrët janë dëmtuar edhe dy automjete në lagjen “Kastriot” në Fier.
Ndërkohë, ndërrimi i viteve në maternitetin e Fierit është shoqëruar me lajme të gëzueshme, ku janë shënuar dy lindje. Foshnja e parë, një djalë, ka ardhur në jetë vetëm 5 minuta pas mesnate, ndërsa foshnja e dytë rreth orës 00:25.
Në Fier, ardhja e vitit të ri u prit me shfaqje dhe koncert në sheshin qendror të qytetit, ku qindra qytetarë festuan pavarësisht temperaturave të ulëta, të cilat zbritën deri në -5 gradë Celsius.
