Fier – Vijon operacioni antikanabis “Koordinata”, zbulohet parcelë me 190 bimë narkotike në fshatin Çipllakë, arrestohet autori
Në vijim të planit operacional policor të koduar “Koordinata”, strukturat e Policisë së Fierit kanë goditur një tjetër rast të kultivimit të bimëve narkotike.
Falë kontrolleve intensive dhe hetimeve të kryera me metoda proaktive, në një sipërfaqe të mbuluar me shkurre në fshatin Çipllakë, njësia administrative Libofshë, u zbuluan 190 bimë të dyshuara si Cannabis Sativa, të kultivuara në mënyrë të fshehtë.
Pas veprimeve procedurale, u arrestua në flagrancë shtetasi L. T., 41 vjeç, si autor i dyshuar i kësaj veprimtarie kriminale. Bimët narkotike ishin mbjellë në një zonë të pyllëzuar, me qëllim shmangien e zbulimit nga strukturat e rendit.
Një pjesë e bimëve u sekuestrua si provë materiale, ndërsa pjesa tjetër u asgjësua me djegie në vendngjarje, nën mbikëqyrjen e Policisë.
Operacioni “Koordinata” vijon me intensitet në të gjithë territorin e qarkut Fier, në funksion të parandalimit, evidentimit dhe goditjes së kultivimit të kanabisit.
Materialet procedurale i janë referuar Prokurorisë së Fierit, për veprime të mëtejshme ligjore.
