FIER/ Zhdukja e 63-vjeçarit në lumin Vjosa mbetet mister, asnjë gjurmë pas pesë ditësh kërkime
Kanë kaluar pesë ditë nga zhdukja e 63-vjeçarit Engjëll Kanani pranë lumit Vjosa, në afërsi të fshatit Kashisht, por ende nuk është gjetur asnjë gjurmë e tij. Policia, familjarët dhe ekipet e polumbarëve vazhdojnë kërkimet, ndërsa mister mbetet mungesa e çdo sendi personal të tij, përfshirë mjetet e peshkimit, çantën dhe celularin.
Burime pranë familjarëve bëjnë me dije se celulari i tij ka qenë i hapur deri 24 orë pas zhdukjes dhe ka pranuar thirrje pa asnjë përgjigje. Kanani, baba i dy fëmijëve dhe banor i Beratit, peshkonte shpesh në lumin Vjosa së bashku me një mik të tij. Miku i 63-vjeçarit ka deklaruar se ditën e zhdukjes ata peshkonin në vende të ndryshme në zonën e Kashishtit dhe kishin lënë një takim që Kanani nuk e përmbushi.
Pas disa orësh mungesë kontakti, shoku i tij njoftoi policinë. Kërkimet janë shtrirë edhe në kanalin Vjosë-Levan-Fier, ku familjarët kanë ndihmuar për dy ditë radhazi në kontrollimin e zonës.
Ndërkohë, sektori i krimeve në Komisariatin e Fierit ka nisur hetime për të zbardhur rrethanat e zhdukjes, duke mos përjashtuar asnjë pistë. Kërkimet vazhdojnë intensivisht, por për momentin nuk ka asnjë të dhënë konkrete për vendndodhjen e 63-vjeçarit.
