Forcat RENEA dhe FNSH ‘zbarkojnë’ në Vlorë, kontrolle në banesat e personave me precedent kriminal, monitorim dhe nga ajri
Orët e para të mëngjesit të së shtunës e kanë gjetur qytetin e Vlorë nën një aksion të gjerë policor. Forca të shumta të policisë, përfshirë efektivë të RENEA dhe FNSH, kanë zhvilluar një operacion gjatë natës në zonën e Lungomare.
Sipas informacioneve paraprake, një nga komplekset e banimit në këtë zonë, i njohur si Kompleksi Oslo, është rrethuar nga policia dhe vijon të jetë nën kontroll të plotë të forcave të rendit.
Monitorimi po bëhet edhe me dron nga ajri për të mbuluar të gjithë perimetrin e zonës së Ujit të Ftohtë.
Deri në këto momente nuk ka një njoftim zyrtar mbi arsyen e operacionit apo objektivin e tij. Burime nga terreni bëjnë me dije se në zonë ka prezencë të shtuar të forcave speciale dhe kontrolle të vazhdueshme.
Pritet që në orët në vijim autoritetet policore të japin më shumë detaje lidhur me këtë aksion.
