Frida Mavriqi: Të rinjtë janë e ardhmja, koha për ndryshim është tani
Drejtuesja e qarkut të Fierit në Partinë Mundësia, Frida Mavriqi, ka theksuar rëndësinë e përfshirjes së të rinjve në politikë, duke deklaruar se ata janë forca që mund të sjellë ndryshimin e nevojshëm në vend.
Në një postim në rrjetet sociale, Mavriqi ka ndarë momente nga takimet e saj me banorët e Fierit, duke dëgjuar shqetësimet dhe historitë e tyre. Ajo shprehet se zhgënjimi i qytetarëve nga sistemi aktual e shtyn akoma më shumë të vijojë këtë rrugë në politikë.
“Të rinjtë janë ata që po kërkojnë mundësi dhe shpresë. Koha është tani që ata të udhëheqin dhe të krijojnë mundësi për të qëndruar këtu, në Shqipëri,” u shpreh Mavriqi.
Gjatë prezantimit të kandidatëve të Partisë Mundësia në Fier, ajo theksoi se qyteti ka nevojë për një përfaqësim të denjë dhe një zë të fortë në parlament, duke premtuar angazhim kundër korrupsionit dhe kapjes së shtetit.
Mavriqi vijon takimet e saj në terren për të forcuar lidhjen me qytetarët dhe për të sjellë në vëmendje sfidat me të cilat përballen ata çdo ditë.
