Hajduk-Dinamo Zagreb/ Përleshje mes ultrasve para sfidës, ka të plagosur dhe të ndaluar
Hajduku i Splitit dhe Dinamo e Zagrebit do përballen sot në ndeshjen e madhe të Kroacisë, sfidë e cila vendos shumë për titullin kampion në futboll.
Përpara ndeshjes ka pasur një përleshje masive mes ultrasve të dy skuadrave, të cilët duket se janë dakordësuar për orarin dhe vendin e përleshjes.
Afro 100 të ndaluar nga policia, ndërsa ka pasur edhe ultras që kanë kërkuar ndihmë mjekësore.
Departamenti i Policisë Split-Dalmaci konfirmoi se një grup i madh individësh ishin të përfshirë në incident rreth orës 9 të mëngjesit të së shtunës. Oficerët mbërritën shpejt në vendngjarje, duke parandaluar përshkallëzimin e mëtejshëm dhe duke rivendosur rendin publik.
Më shumë se 100 persona janë ndaluar dhe janë dërguar në stacionet e policisë për t’u marrë në pyetje, raporton Večernji. Hetimet penale janë duke u zhvilluar aktualisht dhe autoritetet janë ende në kërkim të pjesëmarrësve të tjerë të përfshirë në përleshje.
Disa individë kërkuan ndihmë mjekësore pas incidentit. Sipas dëshmitarëve okularë, rreth 50 anëtarë të grupit të tifozëve të Dinamos, Bad Blue Boys, mbërritën të veshur me maska dhe u përleshën me ata të Hajdukut të Splitit, Torcida.
Me vetëm katër xhiro të mbetura në sezonin 2024-25, vetëm një pikë i ndan tre ekipet e para. Rijeka dhe Hajduk Split aktualisht janë krye me nga 56 pikë, ndërsa Dinamo Zagreb është pas tyre me 55.
