Hakmarrje apo aksident? Vr*sja e Fatos Cenajt në Itali mbetet mister
Vrasja e shqiptarit Fatos Cenaj, 59 vjeç, më 8 qershor në Fontaniva të Italisë, vazhdon të mbetet e pazbardhur. Ekspertët e Policisë Shkencore të Parmës kanë marrë përsipër hetimet, pasi autopsia nuk arriti të përcaktojë llojin e armës dhe motivin e krimit.
Cenaj, ish-roje burgu në Shqipëri, u qëllua për vdekje me një plumb në kokë, teksa udhëtonte me biçikletë për në punë në një stallë kuajsh pranë shtëpisë së tij.
Plumbi hyri nga pas veshit të majtë dhe doli sipër vetullës së djathtë, ndërsa nuk u gjet asnjë gëzhojë në vendngjarje – një rrugë fshati në Via Casoni.
Për shkak të këtyre elementëve të pazakontë, ekspertët do të përgatisin një raport balistik të detajuar, me qëllim që të përcaktojnë trajektoren e plumbit dhe origjinën e të shtënës.
Dy pistat kryesore janë: një pritë hakmarrjeje ndaj Cenajt ose një e shtënë aksidentale nga një shtëpi apo zonë pyjore aty pranë.
Autori i dyshuar është zhdukur pa lënë gjurmë, ndërsa familja dhe komuniteti shqiptar në Itali kërkojnë drejtësi për vrasjen e 59-vjeçarit, i cili ishte shpërngulur kohët e fundit nga Berati për të jetuar me bashkëshorten e tij në Itali.
