I akuzuar për kundërshtim të forcave të rendit, gazetari Vladimir Muçaj Shpallet i Pafajshëm. Fiton gjyqin me Policinë e Fierit
Tiranë, 12 Shkurt 2025 – Pas një procesi gjyqësor që zgjati gati pesë vite, gazetari dhe drejtori i medias online Newsalbania.al, Vladimir Muçaj, është shpallur i pafajshëm nga Gjykata e Apelit Tiranë.
Muçaj ishte akuzuar për kundërshtim të forcave të rendit në Fier, një çështje që kaloi në disa shkallë gjyqësore. Fillimisht, Gjykata e Fierit e pezulloi për mungesë faktesh penale, por vendimi u apelua nga prokuroria. Apeli i Vlorës e riktheu për rigjykim në Fier, ku Gjykata ndryshoi vendimin duke e dënuar me 2 muaj burg. Kjo masë u kundërshtua nga gazetari dhe u apelua në Gjykatën e Apelit Vlorë, e cila e kaloi çështjen në Apelin e Tiranës, që më në fund e shpalli të pafajshëm.
Seancat gjyqësore janë ndjekur nga gazetarë dhe përfaqësues të Unionit të Gazetarëve Shqiptarë, si dhe organizata të medias brenda dhe jashtë vendit, të cilat e kanë konsideruar procesin si një përpjekje për ta ndëshkuar gazetarin për shkrimet dhe qëndrimet e tij kritike.
Muçaj, një figurë me integritet në gazetari, është vlerësuar për qëndrueshmërinë dhe kurajën profesionale. Vendimi i Apelit të Tiranës shihet si një fitore për lirinë e shtypit dhe një precedent i rëndësishëm për sfidat e gazetarëve në Shqipëri.
