I shiti dr*gë mbesës së mitur të ish-kryetarit të Bashkisë Sarandë, dorëzohet në polici Orgest Lena
Orgest Lena, një 21-vjeçar në Sarandë i proceduar më parë për dhënie ndihmë për kalim të paligjshëm të klandestinëve Sirianë, është arrestuar mesditën e sotme nga policia e Sarandës, pasi dyshohet se i ka shitur drogë një vajze minorene.
Ndalimi i Lenës, është kryer me vullnetin e këtij të fundit, pasi ai së bashku me avokatin mbrojtës mësohet se është dorëzuar në ambjentet e komisariatit të Sarandës.
Një javë më parë ai u shpall në kërkim për akuzën e “Prodhimit dhe shitjes së lëndëve narkotike”, pasi i kishte shitur drogë një vajze të mitur 15-vjeçare.
Vajza e mitur është mbesa e një ish-kryetari bashkie në Sarandë, e cila për shkak të konsumimit të drogës, ka pësuar komplikacione shëndetësore duke u shtruar në spitalin Rajonal të Sarandës.
Pas kryerjes së analizave laboratorike, është konstatuar se përkeqësimi i vajzës së mitur ka ardhur si pasojë e konsumimit të lëndëve narkotike.
Gjatë marjes në pyetje, vajza e mitur ka treguar emrin e personit që i kishte shitur drogën, ndaj prej 18 Majit 2025, policia e Sarandës shpalli në kërkim Orgest Lenan.
Ky i fundit 1 javë nga shpallja në kërkim, është vetëdorëzuar sot në polici, ku mësohet se ka dhënë shpjegime.
Pritet që brenda dy ditë ai të dalë para gjykatës së Sarandës për t’u njohur me masën e sigurisë, që do kërkojë përfaqësuesi i akuzës.
