Irani paralajmëron: Ngushtica e Hormuzit do të mbyllet plotësisht nëse SHBA bombardon termocentralet
Shtabi iranian i Forcave të Armatosura të Iranit ka deklaruar se është gati të mbyllë Ngushticën e Hormuzit për një kohë të pacaktuar nëse SHBA do të bombardojë termocentralet e Iranit.
Deklarata e saj e së dielës është paralajmërimi i fundit nga Teherani për hakmarrje për çdo sulm ndaj industrisë së energjisë së vendit, shkruan CNN.
Presidenti amerikan, Donald Trump tha të shtunën se do të urdhëronte bombardimin e një infrastrukture të tillë nëse Ngushtica e Hormuzit nuk do të hapej plotësisht për anijet brenda 48 orëve.
Ushtria e Iranit u përgjigj të dielën se nëse kërcënimet e SHBA-së në lidhje me termocentralet e Iranit zbatohen, Ngushtica e Hormuzit do të mbyllet plotësisht dhe nuk do të rihapet derisa të rindërtohen termocentralet e shkatërruara.
Gjithashtu tha se do të synohet e gjithë infrastruktura e energjisë dhe komunikimit të Izraelit, si dhe “kompani të ngjashme në rajon me aksionarë amerikanë”.
“Termocentralet e vendeve rajonale që strehojnë bazat amerikane do të jenë objektiva legjitime për ne”, shtoi selia ushtarake.
Më herët, kryetari i Parlamentit të Iranit, Mohammad Baqer Qalibaf, tha në një postim në X se infrastruktura kritike dhe objektet energjetike në Lindjen e Mesme mund të “shkatërrohen në mënyrë të pakthyeshme” nëse shënjestrohen termocentralet iraniane.
