Ish-kancelarja MERKEL reagon për pushtimin rus të Ukrainës: Pikë kthese për Europën
Ish-kancelarja gjermane Angela Merkel, e cila është kritkuar për politikat pajtuese të Kremlinit kur ishte në detyrë, ka dënuar sulmin rus ndaj Ukrainës.
Merkel, e cila u largua nga politika në dhjetor pas 16 vitesh në krye të ekonomisë kryesore të Evropës, tha se ajo po e shikonte “sulmin ndaj integritetit territorial dhe sovranitetit” të Ukrainës me shqetësim të madh.
“Lufta e agresionit të Rusisë shënon një pikë kthese të thellë në historinë evropiane pas përfundimit të Luftës së Ftohtë,” tha Merkel në një deklaratë për shtyp.
Gjithashtu Merkel tha se nuk kishte asnjë justifikim për këtë “shkelje flagrante të së drejtës ndërkombëtare” të cilën ajo e dënoi me termat më të ashpër.
Merkel shprehu solidaritetin e saj për popullin dhe qeverinë e Ukrainës dhe mbështetjen e saj të plotë për pasardhësin e saj, Olaf Scholz, në përpjekjet e tij me partnerët perëndimorë, për të ndaluar sa më shpejt Presidentin Vladimir Putin.
Vendimi i Merkelit për të mbajtur lidhje të ngushta diplomatike dhe ekonomike me Rusinë pavarësisht provokimeve të viteve, janë kritikuar si “naive” ditët e fundit pasi Putini ka nxjerrë në pah synimet e tij në Ukrainë.
Ndërkohë kancelari Scholz këtë javë njoftoi planet për të ndalur projektin e gazsjellësit Nord Stream 2 për të sjellë gazin natyror rus në Gjermani si një sanksion kundër Moskës.
Merkel e kishte mbrojtur prej kohësh projektin si vendimtar për strategjinë energjetike të Gjermanisë, pasi ajo heq energjinë bërthamore e qymyrin dhe gradualisht rrit furnizimin e saj nga burimet e rinovueshme.
Paraardhësi i saj si kancelar, Gerhard Schroeder, ka punuar që nga largimi i detyrës në 2005 si lobist për sektorin rus të energjisë, një objektiv i kritikave të ashpra në Berlin.
Ai e kritikoi pushtimin rus të Ukrainës të enjten si të pajustifikuar, por bëri thirrje për ruajtjen e lidhjeve politike, ekonomike dhe të shoqërisë civile me Moskën.
