Kanye West falënderon Shqipërinë pas koncertit në Tiranë: Faleminderit Edi Rama dhe gjithë shqiptarëve për mikpritjen
Në një natë të mbushur me spektakël, Kanye West performoi në “Eagle Stadium” në Tiranë përpara rreth 60 mijë spektatorëve, në një nga koncertet më të mëdha të organizuara ndonjëherë në vend.
Koncerti mblodhi në kryeqytet fansa nga 80 kombësi të ndryshme, të cilët krijuan një atmosferë elektrizuese gjatë gjithë mbrëmjes. Të pranishmit ndanë emocionet dhe pritshmëritë e tyre për një performancë që e kishin pritur prej kohësh.
Pas përfundimit të koncertit, artisti amerikan me famë botërore reagoi me një mesazh falënderues, duke vlerësuar mikpritjen shqiptare dhe organizimin e aktivitetit.
“Faleminderit Edi Rama dhe gjithë Shqipërisë për ndërtimin e një stadiumi dhe për mikpritjen që më bëtë në vendin tuaj të bukur”, shkroi Kanye West në reagimin e tij pas koncertit.
Performanca e tij në Tiranë u shoqërua me një interes të madh ndërkombëtar dhe e ktheu kryeqytetin shqiptar në qendër të vëmendjes për mijëra fansa të ardhur nga vende të ndryshme të botës.
