Kapen autorët e vrasjes së 18- vjeçarit në Shkozë. Dëshmia e mikut çoi në zbardhjen e sherrit që nisi me një: “Ç’a ke që shef?”

Policia e Tiranës ka arritur të arrestojë autorët e vrasjes së 18- vjeçarit Aurelio Dervishi mbrëmjen e djeshme në Shkozë.

Sipas informacioneve të para mësohet se të rinjtë janë të moshës 16 deri në 28 vjeç. Ndërkaq po ashtu është bllokuar dhe mjeti “Volkswagen Tiguan” që ata lëviznin në rrugët e kryeqytetit.

Gjithashtu, është gjetur dhe një armë e ftohtë, thikë, me të cilën u plagos fillimisht 18-vjeçari dhe që do të ndërronte jetë gjatë rrugës për në spital. 

NGJARJA

Pas një sherri me thika midis dy grupe djemsh, një 18-vjeçar i quajtur Aurelio Dervishi ka gjetur vdekjen.

Nga ky sherr i përgjakshëm i mbrëmjes së diel janë zbardhur detaje të reja.

Ngjarja ndodhi rreth orës 21:50, te rrethi i Shkozës dhe dyshohet se janë përfshirë 5 persona.

Autori dhe grupi i të rinjve që janë konfliktuar janë larguar nga vendngjarja fill pas krimit, ndërsa ende nuk janë kapur nga policia.

Nga të dhënat paraprake mësohet se agresorët i kanë bërë shenjë makinës ku lëvizte viktima, Aurelio Dervishi, si pasagjer që të ndalonte, por shoferi nuk është bindur.

Dyshohet se konflikti me thika midis grupeve të të rinjve ka nisur pas një debati të çastit për motivin “Ç’a ke që shef?!”.

Sipas të dhënave paraprake ka pasur një konflikt fizik mes tyre ku një prej të rinjve ka qëlluar me thikë në gjoks 18-vjeçarin. Më pas të rinjtë dyshohet se janë larguar në drejtim të Unazës Lindore me një mjet tip ‘Tiguan’.

Policia ka ngritur disa postblloqe për kapjen e autorëve, duke rënë së fundmi edhe në gjurmët e tyre.

Grupi hetimor ka marrë në pyetje dhe shoferin e automjetit tip ‘Audi’ me te cilin po udhëtonte viktima, ndërsa ai ka pohuar se nuk i njihte autorët.

Sipas tij, personat që ndodheshin në makinën tjetër i kanë thënë ‘pse na shikoni’. Policia vijon hetimet për zbardhjen e ngjarjes së rëndë dhe arrestimin e autorëve.