“Këtu çdo gjë shkon vaj”… Por kamerat nuk i duan! – Pse e tremb Poliklinikën e Fierit prania e medias?
Një incident i papërshtatshëm për një institucion publik është regjistruar ditën e sotme në ambientet e Poliklinikës së Fierit, ku një grup gazetarësh janë përballur me qëndrim armiqësor dhe pengesa nga disa punonjës të këtij institucioni, pavarësisht se ishin të pajisur me leje zyrtare nga Drejtoria e Spitalit Rajonal Fier.
Gazetarët ndodheshin aty me qëllimin për të realizuar një material informues mbi ndikimin e temperaturave të larta në shëndetin e qytetarëve – një çështje me interes publik, sidomos në kulmin e vapës së verës. Por në vend të bashkëpunimit, ata u përballën me sjellje ofenduese, arrogancë dhe komente përçmuese nga disa infermierë dhe punonjës të poliklinikës.
Disa prej punonjësve shkuan deri aty sa të diktonin gazetarëve se ku duhet të shkonin dhe çfarë të raportonin, duke u shprehur se “këtu çdo gjë shkon vaj”, si të ishin zëdhënës të institucionit dhe jo shërbyes të shëndetit publik.
Nuk është hera e parë që media përballet me pengesa në Spitalin dhe Poliklinikën e Fierit. Këto episode vënë në pikëpyetje qasjen e këtij institucioni ndaj transparencës dhe llogaridhënies publike.
Në një kohë kur qytetarët kanë të drejtë të informohen mbi cilësinë e shërbimeve publike që financojnë me taksat e tyre, refuzimi i bashkëpunimit me median ngre pikëpyetje serioze: Çfarë ka për të fshehur ky institucion?
Transparenca nuk është privilegj, por detyrim ligjor dhe moral i çdo institucioni publik. Prania e medias nuk duhet të përjetohet si kërcënim, por si mundësi për të treguar përkushtim, etikë dhe profesionalizëm.-FIERIWEB.COM
