Kina i dhuron dy panda SHBA-së/ Rikthehet “diplomacia e pandave” pas më shumë se 50 vitesh
Kina do të dërgojë dy panda gjigante në Shtetet e Bashkuara, në kuadër të një marrëveshjeje të re me Kopshtin Zoologjik të Atlantës. Presidenti kinez Xi Jinping njoftoi se pandat, Ping Ping dhe Fu Shuang, do të mbërrijnë në Atlanta në ditët në vijim.
Gjatë fjalës së tij në Shtëpinë e Bardhë, Xi e cilësoi pandën si një “të dërguar të miqësisë” mes Kinës dhe SHBA-së, duke iu referuar rolit që këto kafshë kanë luajtur prej dekadash në marrëdhëniet mes dy vendeve.
Kopshti Zoologjik i Atlantës kishte njoftuar që në prill se do të priste dy panda të reja, një mashkull të quajtur Ping Ping dhe një femër, Fu Shuang. Të dyja kanë lindur në bazën kërkimore të mbarështimit të pandave gjigante në Chengdu të Kinës.
Tradita që nisi në vitin 1972
“Diplomacia e pandave” mes Pekinit dhe Uashingtonit daton në vitin 1972, pas vizitës historike të presidentit amerikan Richard Nixon në Kinë. Në atë periudhë, Kina i dhuroi SHBA-së dy panda, në një moment që shënoi përmirësimin e marrëdhënieve diplomatike mes dy vendeve pas dekadash tensioni.
Që prej asaj kohe, pandat janë bërë një simbol i rëndësishëm i marrëdhënieve dhe bashkëpunimit mes Kinës dhe vendeve të tjera.
Në kuadër të marrëveshjeve të tilla, pandat mbeten pronë e Kinës. Edhe pasardhësit e tyre konsiderohen pronë kineze, ndërsa kopshtet zoologjike amerikane kontribuojnë financiarisht në programet e ruajtjes së pandave gjigante në Kinë.
Për Kopshtin Zoologjik të Atlantës, rikthimi i pandave vjen pas një ndërprerjeje dyvjeçare. Pandat e mëparshme u kthyen në Kinë në vitin 2024, pas përfundimit të marrëveshjes së atëhershme të bashkëpunimit.
