Korçë/ Finalizohet operacioni antidrogë “Befasia 2”, në pranga dy të rinj, sekuestrohen Cannabis Sativa dhe fara
Pas dy muajsh hetime me metoda proaktive, Policia e Korçës ka finalizuar operacionin e koduar “Befasia 2”, në kuadër të të cilit janë arrestuar dy persona të dyshuar për prodhim dhe shitje të lëndëve narkotike.
Në pranga kanë rënë H. C., 28 vjeç, banues në fshatin Bilisht, dhe Sh. D., 27 vjeç, banues në fshatin Eçemenik.
Operacioni u zhvillua nga specialistët e Seksionit për Hetimin e Narkotikëve, në bashkëpunim me shërbimet e Forcës së Posaçme “Shqiponja” të DVP Korçë.
Sipas Policisë, shërbimet kanë lokalizuar dhe ndaluar në rrugën e fshatit Eçemenik një automjet me drejtues 28-vjeçarin H. C. dhe pasagjer 27-vjeçarin Sh. D.
Gjatë kontrollit të automjetit, policia gjeti një qese me lëndë të dyshuar narkotike Cannabis Sativa. Sipas uniformave blu, dy të dyshuarit kanë tentuar ta hedhin qesen nga automjeti në momentin që janë afruar punonjësit e Policisë.
Kontrollet vijuan edhe në banesën e shtetasit H. C., ku u gjet një tjetër qese me fara të dyshuara narkotike Cannabis Sativa.
Lënda e dyshuar narkotike, farat dhe automjeti janë sekuestruar në cilësinë e provës materiale.
Materialet procedurale i janë referuar Prokurorisë së Korçës, për veprime të mëtejshme, për veprën penale “Prodhimi dhe shitja e narkotikëve”, kryer në bashkëpunim.
