Korçë/ Ndihmonte refugjatët të kalonin nga Greqia në Shqipëri, përfundon në pranga 18-vjeçari nga Siria
Policia Kufitare e Korçës finalizoi operacionin e koduar “Lugina 2”, duke goditur një tjetër rast të veprimtarisë kriminale të ndihmës për kalim të paligjshëm të kufirit, kundrejt pagesës.
Në kuadër të këtij operacioni, u arrestua në flagrancë shtetasi sirian Muhamed Hamad, 18 vjeç, i cili u kap gjatë natës në fshatin Vidohovë, duke shoqëruar gjashtë emigrantë nga Egjipti dhe Siria, katër prej të cilëve ishin të mitur. Sipas hetimeve, i riu organizonte kalime të paligjshme nga Greqia drejt Shqipërisë dhe më pas në Mal të Zi, me destinacion final vendet e Bashkimit Evropian.
Drejtoria Vendore për Kufirin dhe Migracionin Korçë, në bashkëpunim me Stacionin e Policisë Kufitare Kapshticë dhe Prokurorinë e Korçës, bazuar në inteligjencën policore, kishte zhvilluar prej muajsh hetime mbi aktivitetin e këtij shtetasi. Rezultatet treguan se ai ishte përfshirë në disa tentativa të mëparshme, ku emigrantët janë kapur nga policia në përpjekje për të kaluar kufirin.
Hetimet vijojnë për dokumentimin e plotë të veprimtarisë kriminale dhe identifikimin e personave të tjerë të përfshirë. Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
