Krasniqi: Shqipëria drejt turizmit gjithëvjetor, priten mbi 14 milion turistë këtë vit
Eksperti i turizmit, Isa Krasniqi, i ftuar në studion e “Ora News”, foli mbi rritjen e ndjeshme të turizmit në Shqipëri dhe pritshmëritë optimiste për vitin 2025.
” Të flasim për turizmin është diçka e mirë pasi i jep vendit një ekonomi goxhta të mirë. Kur them vendit pra, përfshi edhe qeverinë por përfshi dhe sektorin privat.
Është një nga sektorët më të rëndësishëm të zhvillimit në Shqipëri.
Shifrat flasin shumë mirë për këtë vit, e kemi filluar mbarë sepse në janar të këtij viti kanë ardhur 560 mijë në Shqipëri.
Në krahasim me vitin e kaluar jemi diku 13% më shumë si shifra. Këtë vit pritet të ketë turizëm afërsisht 20% më shumë sesa vjet, pra mund të shkoj numri në 14 milion turistë.
Ndërsa në aeroportin e Tiranës priten të zbresin mbi 12 milion turistë, të cilët do e vizitojnë Shqipërinë.
Shqipëria po shkon drejt turizmit gjithëvjetor dhe gjithashtu turizmit malor”, u shpreh Krasniqi.
