Ksamil/ Përfshihet nga flakët një mjet lundrues, shpëtohen në kohë 4 shtetas gjermanë
Një mjet lundrues është përfshirë nga flakët në zonën e “Pemës së Thatë”, në Ksamil, ndërsa në bord ndodheshin 4 shtetas gjermanë.
Pas marrjes së njoftimit për incidentin, shërbimet e Policisë Kufitare dhe të Njësisë Policore Detare, të cilat ndodheshin pranë zonës, u nisën menjëherë drejt vendngjarjes.
Falë ndërhyrjes së shpejtë të efektivëve të Policisë, mjeti lundrues u lokalizua dhe 4 shtetasit gjermanë u evakuuan në kohë. Ata u transportuan me mjetin e Policisë drejt bregut dhe, sipas autoriteteve, ndodhen në gjendje të mirë shëndetësore dhe nuk kanë pësuar dëmtime fizike.
Pas shpëtimit, shtetasit gjermanë kanë falënderuar punonjësit e Policisë për ndërhyrjen në kohë dhe ndihmën e dhënë.
Ndërkohë, grupi hetimor vijon punën për përcaktimin e shkakut të rënies së zjarrit dhe dokumentimin e plotë të rrethanave të incidentit.
