Kukës – Vetëdorëzohen dy vëllezër të shpallur në kërkim pas një konflikti të dhunshëm
Policia e Kukësit ka vijuar veprimet hetimore dhe kontrollet intensive për dokumentimin e plotë të rrethanave të ngjarjes së ndodhur ditën e djeshme, si dhe për kapjen e dy autorëve të dyshuar, të shpallur në kërkim.
Si rezultat i veprimeve të Policisë dhe pamundësisë për t’u larguar, dy vëllezërit e shpallur në kërkim janë vetëdorëzuar pranë autoriteteve.
Në vijim të procedurave ligjore dhe pas komunikimit me prokurorin e gatshëm, specialistët për Hetimin e Krimeve të Rënda arrestuan shtetasin N. I., 38 vjeç, ndërsa për vëllanë e tij, F. I., 39 vjeç, banues në Kodër Lumë, materialet u referuan në Prokurori dhe nisi procedimi penal në gjendje të lirë.
Sipas Policisë, dy vëllezërit janë përfshirë në një konflikt fizik me shtetasin S. K., 65 vjeç, për motive të dobëta, në vendin e quajtur “Dëshmorët”. Gjatë përplasjes, shtetasi N. I. e ka goditur 65-vjeçarin me qytën e një pistolete, si dhe ka plagosur rëndë, nga pakujdesia, shtetasin A. C., 36 vjeç, i cili nuk kishte lidhje me konfliktin.
Në cilësinë e provës materiale, Policia sekuestroi armën e zjarrit të dyshuar të përdorur gjatë ngjarjes.
Materialet procedurale shtesë i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme ligjore.
