Kush është 53-vjeçari që humbi jetën në punë në Divjakë. (EMRI)
Një punëtor i pikës së grumbullimit të fruta-perimeve në Divjakë ka gjetur vdekjen në vendin e punës. Ngjarja ka ndodhur ditën e sotme rreth orës 10:00, në kohën kur viktima Ilir Lena, 53 vjeç ka qenë duke ngarkuar karota.
Ai është goditur në kokë nga makineria në momentin që është ulur për të rregulluar produktin.
Menjëherë i janë ofruar për ndihmë punëtorët e tjerë dhe është njoftuar ambulanca e Divjakës.
Sipas mjekëve të shërbimit të urgjencës 53-vjeçari ka ardhur me shenja jete në Divjakë, por për mjekim më të specializuar është dërguar në spitalin e Lushnjes nga ku rrugës ka ndërruar jetë.
Policia ka sekuestruar kamerat e brendshme të ambientit të pikës së grumbullimit për të parë sesi ka ndodhur ngjarja.
Koleget e viktimës pohojnë se makineria i zuri kokën në një moment shpërqendrimi, pasi koshi prej metali ishte shtypur për të marre ngarkesën dhe nuk është ndalur deri në fund.
Policia ka marrë në pyetje administratorin e magazinës, Ristan Jankon, për të zbardhur ngjarjen. Gjithashtu në pyetje janë marrë edhe disa nga punonjësit e pikës së grumbullimit.
Viktima kishte mbi 20 vjet që punonte si punëtor në fruta-perimet e kësaj magazine.
