Lushnjë – Plagosje me thikë pas një konflikti, arrestohet 25-vjeçari
Një ngjarje e rëndë ka ndodhur mbrëmjen e djeshme në lagjen “Xhevdet Nepravishta” të qytetit të Lushnjës, ku një 26-vjeçar ka mbetur i plagosur rëndë pas një konflikti për motive të dobëta. Falë ndërhyrjes së shpejtë të Policisë, autori i dyshuar është arrestuar në flagrancë.
Sipas informacioneve zyrtare, shërbimet e Komisariatit të Policisë Lushnjë ndërhynë menjëherë pas marrjes së njoftimit për konfliktin mes dy shtetasve. Si rezultat i operacionit të shpejtë, u bë e mundur kapja dhe arrestimi i shtetasit E. Ç., 25 vjeç, banues në Stan Karbunarë.
Nga veprimet hetimore të deritanishme, dyshohet se autori, pas një përplasjeje të çastit, ka goditur me thikë shtetasin A. Y., 26 vjeç, duke i shkaktuar dëmtime të rënda. I plagosuri ndodhet aktualisht në spital, nën kujdesin e mjekëve.
Materialet procedurale i kanë kaluar Prokurorisë pranë Gjykatës së Shkallës së Parë Fier për veprime të mëtejshme, ndërsa 25-vjeçari do të përballet me akuzat për “Plagosje e rëndë me dashje” dhe “Prodhim dhe mbajtje pa leje e armëve të ftohta”.
