Mbresa nga vizita në Roskovec – Ymer Hysa: Kush e bën punën me dashuri e bën mirë

🖋 Nga Ymer Hysa, Anëtar i Unionit të Gazetarëve Shqiptarë

Roskoveci në kujtesën time ishte një emër i dëgjuar për herë të parë në vitin 1981, kur një shoqe e grupit në fakultet u prezantua si vajzë nga ky qytet. Më pas, e njohur në mënyrë anekdotike nga shprehja popullore “Pazari i Roskovecit”, nuk kisha patur rastin ta vizitoja personalisht – deri më 4 korrik 2025.

Udhëtimi im në Roskovec ndodhi falë një aktiviteti kulturor domethënës: Edicioni i V-të i ndarjes së çmimeve në gazetari “Aristidh Kola – Nderi i Kombit”, i organizuar nga Kryetari i Unionit të Gazetarëve Shqiptarë, dega Fier, Vladimir Muçaj, dhe platforma mediatike NewsAlbania.com.

Një pritje e ngrohtë në një qytet të kuruar

Roskoveci ndodhet vetëm 15-20 minuta nga qyteti i Fierit, dhe rruga deri atje është e asfaltuar dhe e mirëmbajtur. Peizazhi gjatë rrugës të lë pa fjalë – fusha të mbjella, kodra me ullinj e vreshta, dhe, si një “dele e zezë” që të rikujton historinë industriale të zonës, shfaqen edhe depozitat e naftës.

Në hyrje të qytetit na mirëpret rrethrrotullimi me shtatoren “Vajza Myzeqare”, simbol i bukurisë dhe punës së femrës myzeqare. Në qendër të qytetit, pranë bashkisë, na udhëzuan si të parkojmë dhe na urojën mirëseardhjen. U ngjitëm në katin e dytë të godinës moderne ku na priti Kryetarja e Bashkisë Roskovec, znj. Majlinda Bufi, një zonjë e thjeshtë, e buzëqeshur dhe me një ndjesi të menjëhershme përkushtimi.

Një bashki me vizion dhe energji rinore

Në një bisedë miqësore, znj. Bufi na rrëfeu për zhvillimet e shumta të bashkisë që drejton prej 11 vitesh, tashmë në mandatin e saj të tretë. Në çdo fjali të saj reflektohej njohuri dhe dashuri për qytetin dhe njerëzit që e banojnë.

Roskoveci ka një sipërfaqe prej rreth 118 km², mbi 25 mijë banorë, me bujqësinë si sektor dominues, veçanërisht serat (mbi 50 ha) dhe 450 mijë rrënjë ullinj. Ajo na foli edhe për projektet e ardhshme si ndërtimi i ujëmbledhësit dhe vaditja e mbi 5 mijë hektarëve tokë bujqësore.

Me krenari tregoi se mbi 70% e punonjësve të bashkisë janë nën 40 vjeç dhe mbi 50% janë gra, një tregues i qartë i politikave gjithëpërfshirëse dhe rinore që ndjek drejtimi i saj.

Roskoveci i kulturës, mikpritjes dhe trashëgimisë

Kryetarja u shpreh:

“Roskoveci nuk është më ‘pazari’ që kanë dëgjuar, por një qytet ku punohet, jetohet dhe gëzohet. E kemi bërë të jetueshëm, veçanërisht për gratë dhe vajzat, me hapësira publike të sigurta e çlodhëse.”

Qyteti ka shumë për të ofruar edhe për vizitorët – nga objektet e kultit, këngët e vallet tradicionale, te ushqimi i mirëfilltë myzeqar dhe, mbi të gjitha, mikpritja dhe bujaria.

Çmime për figurat e spikatura shqiptare

Aktiviteti në sallën e bashkisë u zhvillua me pjesëmarrjen e një jurie profesionale të kryesuar nga gazetari kosovar Ilir Krasniqi, ku u vlerësuan:

• Mimoza Marjanaku – aktore e mirënjohur e teatrit shqiptar,
• Mentor Kikia – gazetar i njohur dhe drejtues i platformave mediatike,
• FieriWeb.com – media online me ndikim lokal,
• Agron Goga – studiues dhe shkrimtar nga Roskoveci,
• Majlinda Bufi – për drejtimin efikas dhe vizionar të bashkisë Roskovec.

Pas ceremonisë, të pranishmit u ftuan në një darkë tradicionale ku nuk munguan kënga, dollia dhe humori, tipare të pandashme të karakterit myzeqar.

Një kujtim që mbetet gjatë

Nga Roskoveci u larguam me bindjen se kishim vizituar një qytet të transformuar, me njerëz të mirë, punë të ndershme dhe një udhëheqëse model që e njeh dhe dashuron vendin që drejton. Një qytet që ia vlen ta vizitosh – dhe mbi të gjitha – ta mbash mend.

📅 4 korrik 2025