Michael Schumacher nuk është më i detyruar të qëndrojë në shtrat, 12 vjet pas aksidentit të rëndë
Kampioni legjendar i Formula 1, Michael Schumacher, raportohet se nuk është më i detyruar të qëndrojë vazhdimisht në shtrat, 12 vite pas dëmtimit të rëndë në kokë që pësoi gjatë një aksidenti me ski në Alpet Franceze në vitin 2013.
Sipas burimeve pranë familjes, 57-vjeçari tashmë mund të ulet në karrocë dhe të lëvizë brenda pronave të tij, si në Majorka ashtu edhe pranë Liqenit të Gjenevës. Gjendja e tij shëndetësore vazhdon të mbetet shumë e rezervuar dhe larg syrit të publikut.
Schumacher merr kujdes mjekësor 24 orë në ditë, nën përkujdesjen e bashkëshortes së tij, Corinna Schumacher, dhe një ekipi të specializuar mjekësor. Burimet bëjnë me dije se ish-piloti legjendar kupton disa nga gjërat që ndodhin përreth tij, por jo gjithçka.
Që nga aksidenti tragjik, Michael Schumacher nuk është shfaqur asnjëherë në publik. Në vitin 2024 pati spekulime se ai mund të merrte pjesë në dasmën e vajzës së tij, Gina-Maria Schumacher, por kjo nuk ndodhi. Ndërkohë, vitin e kaluar, tre ish-punonjës të familjes u dënuan nga drejtësia pasi kërcënuan se do të publikonin qindra foto të Schumacher në gjendjen e tij aktuale.
Së fundmi, vajza e tij ndau në rrjetet sociale një foto të rrallë familjare, të realizuar para aksidentit, e shoqëruar me mbishkrimin prekës:
“Më të mirat përgjithmonë. Gëzuar ditëlindjen baba.”
Familja Schumacher vazhdon të mbrojë me fanatizëm privatësinë e kampionit shtatë herë të botës, duke dhënë vetëm informacione minimale mbi gjendjen e tij shëndetësore.
