Misioni i Shqipërisë në Bruksel/ Rama: Diplomatët dhe profesionistët e rinj të bëhen pjesë e ‘Team Albania’
Kryeministri Edi Rama iu ka bërë thirrje qytetarëve shqiptarë, që jetojnë brenda dhe jashtë vendit, që të aplikojnë për t’u bërë pjesë e misionit diplomatik të Shqipërisë në Bruksel.
Në një postim në rrjete sociale, kreu i qeverisë fton diplomatët dhe profesionistët e rinj të marrëdhënieve ndërkombëtare që të kontribuojnë në anëtarësimin e Shqipërisë në Bashkimin Evropian.
“Mirëmëngjes dhe me thirrjen publike për të gjithë diplomatët e profesionistët e rinj të marrëdhënieve ndërkombëtare në vend apo ata jashtë vendit, të cilët janë angazhuar me institucione ndërkombëtare, për të aplikuar dhe konkuruar për t’u bërë pjesë e #TeamAlbania4EU në Misionin e Republikës së Shqipërisë në Bruksel, ku përfaqësia jonë do të rritet në numër e në ekspertizë, ju uroj të gjithëve të diel të paqtë”, shkruan Rama në Facebook.
