Nëna e 15-vjeçares së përfshirë në dhunimin e 17-vjeçares: “Kur kthehej në orët e para të mëngjesit, thoshte se ishte me shoqet”
Nëna e njërës prej 15-vjeçareve të përfshira në dhunimin e 17-vjeçares në Fier ka folur sërish para mediave, përpara ambienteve të Gjykatës së Fierit, ku u zhvillua seanca për verifikimin e masave të sigurisë ndaj tre vajzave të dyshuara.
Ajo deklaroi se vajza e saj ndodhet e shtruar në spital psikiatrik, ku po merr trajtim mjekësor, ndërsa theksoi se familja kishte kërkuar ndihmë prej kohësh për gjendjen e saj.
Sipas saj, problemet kishin nisur që kur e bija ishte nxënëse në një shkollë 9-vjeçare shtetërore. Ajo pretendon se familja kërkoi mbështetje nga shkolla dhe psikologia, por nuk mori ndihmën e nevojshme. Më pas iu drejtuan Zyrës Arsimore Fier dhe tentuan ta regjistronin vajzën në një shkollë private, ku, sipas nënës, ajo nuk shkoi asnjë ditë pasi ndihej e bullizuar.
Nëna tha gjithashtu se nuk është në dijeni të diagnozës apo trajtimit që po merr vajza në spital.
“Nuk di asnjë gjë për gjendjen shëndetësore të vajzës. Jam shqetësuar shumë. Në spital e kam takuar dy herë, më duket jo aq mirë. Nuk e di nëse është në dijeni të pamjeve që janë bërë virale. Kur kthehej në orët e para të mëngjesit më thoshte se kishte qenë me shoqet, nuk më tregonte më shumë. Nuk i njihja shoqet dhe as prindërit e tyre. I pashë për herë të parë në polici. Vajzën që është dhunuar dhe familjen e saj nuk i njoh fare. Nuk kam marrë avokat për vajzën. Prej një viti kemi kërkuar ndihmë. Kur shkuam në shkollë bashkë me bashkëshortin, drejtoresha na nxori jashtë. Unë dua vetëm kurimin e plotë për vajzën time dhe këtë e kam kërkuar edhe në gjykatë”, u shpreh ajo.
Ndërkohë, në Gjykatën e Shkallës së Parë të Juridiksionit të Përgjithshëm Fier u paraqitën tri vajzat e përfshira në ngjarjen që tronditi opinionin publik.
19-vjeçarja Lionela Lamaj dhe dy 15-vjeçaret dolën para trupit gjykues për verifikimin e kushteve dhe kritereve të vijimit të masave të sigurisë.
Lionela Lamaj është arrestuar me kërkesë të Prokurorisë, nën dyshimin për veprën penale “Heqja e paligjshme e lirisë”, kryer në bashkëpunim, ndërsa dy të miturat vijojnë të jenë nën hetim në kuadër të të njëjtit procedim penal.
