Nëna e 27-vjeçarit shqiptar ndërroi jetë nga arrest kardiak, nuk duroi humbjen e djalit të vetëm
Tragjedia që goditi komunitetin e Euboës dhe Beotisë ka marrë një dimension edhe më të dhimbshëm. Nëna e 27-vjeçarit shqiptar, punëtor ndërtimi, i cili u gjet i djegur brenda një makine në Skurta të Beotisë më 8 nëntor, ndërroi jetë dje nga arrest kardiak, duke mos e përballuar humbjen e djalit të saj.
Detajet e para nga ngjarja tronditëse tregojnë se i riu nga Khalkidhë ishte tërhequr në Vilia për një takim me një grua të njohur përmes një aplikacioni takimesh. Por takimi ishte një kurth i mirë-organizuar. Sipas policisë, ai u mbajt peng për rreth 24 orë, u torturua, pastaj u qëllua për vdekje, dhe më pas trupin e transferuan në Skurta, duke i vënë zjarr makinës për të fshirë gjurmët.
Vetura ku u gjet kufoma ishte raportuar e vjedhur në maj nga Glifadha dhe mbante targa nga një makinë tjetër në Pieria, çka sugjeron se pas krimit mund të qëndrojë një rrjet i organizuar me metoda profesionale. Hetuesit besojnë se 27-vjeçari është vrarë në një vend tjetër dhe më pas është transportuar në zonën e shkretë.
Policia vazhdon kërkimet intensive, ndërsa fokusi është telefoni i viktimës, i cili ende nuk është gjetur dhe pritet të përmbajë informacione kyçe mbi organizatorët e krimit.
Ky krim i tmerrshëm ka tronditur komunitetet e Khalkidhës dhe Beotisë, ku banorët flasin për një vrasje me brutalitet të paparë. Autoritetet thonë se zbardhja e plotë e ngjarjes është çështje kohe, pasi gjurmët po çojnë gradualisht te autorët dhe organizatorët e kësaj vepre makabre.
