Nënkryetari i PD-së Fier thyen heshtjen: Përgjegjësinë për degradimin e degës ia adreson deputetit Luan Baçi
Mond Plaka, nënkryetar i Partisë Demokratike në Fier dhe ish-kryetar për disa mandate i Komunës Kuman, ka folur hapur për situatën aktuale në degën lokale të PD-së, duke adresuar drejtpërdrejt përgjegjësitë për, sipas tij, degradimin e saj.
Sipas Plakës, Partia Demokratike në Fier është praktikisht inekzistente dhe e shkëputur nga qytetarët dhe problematikat e tyre të përditshme. Ai ia atribuon këtë gjendje deputetit të PD-së, Luan Baçi, duke e konsideruar atë përgjegjësin kryesor për dështimin dhe dobësimin e strukturave lokale të partisë.
Plaka thekson se përmbytjet e fundit në Fier nxorën qartë në pah mungesën totale të PD-së në terren, si në aspektin e mbështetjes së qytetarëve të prekur, ashtu edhe në reagimin institucional ndaj situatës së krijuar.
Sipas tij, në degën e PD-së Fier mbizotëron një klimë e fortë kontrolli, ku asnjë zyrtar apo përfaqësues i partisë nuk lejohet të flasë apo të japë intervista pa miratimin e deputetit Baçi. Kjo e drejtë, sipas Plakës, është e rezervuar vetëm për deputetin.
“Ajo që demokratët e Fierit e kanë thënë prej kohësh nën zë, sot doli hapur,” nënvizon Plaka. “PD-ja e Fierit është larg njerëzve dhe halleve të tyre.”
Deklaratat e tij pritet të nxisin reagime dhe debate brenda strukturave të Partisë Demokratike në Fier, në një kohë kur opozita lokale përballet me sfida të forta organizative dhe politike.
Intervistoi Gazetari Besnik Sulejmani – www.fieriweb.com
