Ngacmoi seksualisht të miturën, Prokuroria e Fierit kërkon masën ‘arrest me burg’ për 60-vjeçarin
Prokuroria e Fierit kërkon masën ‘arrest me burg’ për 60-vjeçarin që dyshohet se ka ngacmuar seksualisht një të mitur.
Njoftimi:
Ngacmoi seksualisht të miturën, Prokuroria Fier kërkon caktimin e masës “Arrest në burg” për shtetasin Shpëtim Lazaj
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Fier, u arrestua shtetasi Sh.L., nën akuzë për veprën penale ‘Ngacmimi seksual’, parashikuar nga neni 108/a, pg.2 i Kodit Penal.
Procedimi penal nr. 415 datë 01.04.2025, u regjistrua mbi bazën e kallëzimit të shtetases V.M, e cila ka kallëzuar se shtetasi Sh.L ka ngacmuar seksualisht vajzën e saj të mitur. Në kuadër të këtij kallëzimi, Prokuroria në bashkëpunim me policinë, kryen një hetim të plotë të rastit duke arritur të krijojnë dyshime të arsyeshme se shtetasi Sh.L ka kryer veprime konkrete të natyrës seksuale në dëm të të miturës, duke konsumuar elementët e veprës penale “Ngacmimi seksual”, parashikuar nga neni 108/a pg.2 i Kodit Penal.
Bazuar në rrethanat e mësipërme, policia gjyqësore ka kryer arrestimin e shtetasit Sh.L, dyshuar për veprën penale “Ngacmimi seksual”, parashikuar nga neni 108/a, pg.2 i Kodit Penal. Për këtë fakt, Prokuroria pranë Gjykatës së Shkallës së Parë Juridiksionit të Përgjithshëm Fier ka kërkuar vleftësim të ligjshëm të arrestit në flagrancë dhe caktimin e masës së sigurimit personal “Arrest në burg”.
Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë për hetimin e shpejtë dhe vënien para përgjegjësisë ligjore të personave që kryejnë vepra penale që cënojnë apo dëmtojnë mirëqënien dhe zhvillimin normal të të miturve.
