Ngjarje e rëndë në Sarandë: 8 persona në pranga, përfshirë 4 efektivë policie
Sarandë – Prokuroria e Sarandës, në bashkëpunim me Agjencinë e Mbikëqyrjes Policore (AMP) dhe Komisariatin e Policisë Sarandë, ka ekzekutuar urdhër-arreste për 8 persona pas një konflikti të dhunshëm që ndodhi pas mesnate në fshatin Gjashtë. Ngjarja, e nisur për shkak të një borxhi, ka degjeneruar në përplasje me armë zjarri dhe përdorim të sendeve të forta, duke lënë dy persona të plagosur.
Në mesin e të arrestuarve janë edhe 4 efektivë policie: Alvaro Sulejmani (Komisariati i Policisë Himarë), Kidi Sulejmani dhe Ergis Sulejmani (Policia Kufitare Sarandë), si dhe Redi Sulejmani, student në Akademinë e Policisë Tiranë. Gjithashtu, është arrestuar edhe Igli Duka, ish-efektiv policie, tashmë i njohur për përfshirje në aktivitete të paligjshme jashtë vendit.
Dy persona të tjerë janë shpallur në kërkim, ndërsa 2 individë të përfshirë në incident po procedohen në gjendje të lirë. Të gjithë të dyshuarit janë raportuar si të afërm dhe miq me njëri-tjetrin, duke përfshirë anëtarë të fiseve Sulejmani, Duka dhe një shtetas me mbiemër Cocka.
Autoritetet po hetojnë dinamikën e ngjarjes, ndërsa detaje të tjera priten nga një deklaratë për shtyp e Agjencisë së Mbikëqyrjes Policore.
