Ngjarje tronditëse bullizmi në Fier/ Katër vajza dhunojnë bashkëmoshataren e tyre, pamjet i dorëzohen Policisë
Një rast i rëndë bullizmi është denoncuar së fundmi nga qytetarët në redaksinë e JOQ Albania. Ngjarja ka ndodhur në qytetin e Fierit, ku disa vajza adoleshente janë filmuar duke keqtrajtuar fizikisht dhe psikologjikisht një bashkëmoshatare të tyre.
Në videon e publikuar, shihen tre vajza që thërrasin njëra-tjetrën me emrat Kejsi, Nenda dhe Marsi, teksa ofendojnë, godasin me pëllëmbë dhe tërheqin për flokësh një vajzë të re, duke e detyruar të thotë fjalë ofenduese dhe të kërkojë falje. Në një moment, vajza me emrin Marsi dëgjohet duke thënë:
“Guxo përmendma emrin tim… do të rrjep si pula. Do t’i heq këto leshtë e kokës, do të bëj tullace, do të qeth zero moj…”
Vajzat më pas marrin në telefon një djalë të quajtur Romeo dhe e detyrojnë vajzën të përdorë fjalor banal me të. Ngjarja përfundon me viktimën e dhunuar që hidhet në shkurre.
Një qytetar që denoncoi ngjarjen, shkruan për JOQ:
“Nuk dua të më publikohet emri. Shiko çfarë ndodh me vajzat në Fier. Janë degjeneruar totalisht! 4 kundër 1? Edukoni fëmijët! Kjo nuk është sjellje normale!”
JOQ Albania ka vënë në dispozicion të Policisë së Fierit pamjet origjinale të ngjarjes, duke kërkuar ndërhyrje të menjëhershme për të ndëshkuar aktorët e këtij episodi të rëndë bullizmi.
Mbetet në pritje një reagim zyrtar nga autoritetet, ndërkohë që qytetarët shprehen të tronditur dhe kërkojnë masa të menjëhershme për të ndaluar përhapjen e dhunës mes të rinjve dhe për të mbrojtur viktimat e bullizmit nga pasojat psikologjike dhe fizike.
