Njëri vodhi para në një lokal, tjetri i mori celularin një turisti amerikan. Arrestohen 2 ”skifterët” në Vlorë
Policia e Vlorës ka vënë në pranga dy persona të dyshuar për vjedhje në raste të ndryshme, pas veprimeve hetimore dhe operacionale.
52-vjeçari vidhte para në një lokal
Shtetasi L. Gj., 52 vjeç, banues në Fier, është arrestuar nga specialistët për Hetimin e Krimeve të Komisariatit të Policisë Vlorë, pasi dyshohet se ka vjedhur në mënyrë të përsëritur para, në një lokal në pronësi të shtetasit L. C. Sipas hetimeve, gjatë periudhës dhjetor 2024 – janar 2025, ai ka marrë një shumë totale prej 100 000 lekësh. Arrestimi u bë pas administrimit të pamjeve filmike që dokumentonin veprimtarinë e tij kriminale.
34-vjeçari kapet në flagrancë pasi vodhi një celular
Në një tjetër rast, policia ka arrestuar në flagrancë shtetasin G. L., 34 vjeç, banues në Vlorë, i cili më 13 shkurt 2025, në lagjen “Osman Haxhiu”, i ka vjedhur celularin një turisti amerikan. Falë ndërhyrjes së menjëhershme të uniformave blu, autori u identifikua dhe u kap, ndërsa celulari i vjedhur u sekuestrua.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Vjedhja”.
