Pa patentë dhe nën efektin e drogës, 19-vjeçari kryen manovra të rrezikshme me makinë pranë shkollës, arrestohet
Një 19 vjeçar leje drejtimi dhe nën efektin e drogës ka kryer manovra të rrezikshme me makinë pranë një shkolle. i riu më pas është arestuar nga policia.
Njoftimi:
Policia Rrugore është angazhuar në terren për rritjen e sigurisë rrugore ne lidhje me sjelljen e fëmijëve ne rrugë, si këshillues, si mbështetje dhe si imazh, të cilit i besohet mbarëvajtja dhe garantimi i rendit dhe sigurisë në shkolla.
Ditën e sotme me datë 11.04.2024, Oficerja e Sigurisë dhe Drejtoresha e Shkollës së mesme “Feti Vogli”, Tiranë, kanë njoftuar se një nxënës i vitit të tretë në shkollën e tyre, shtetasi L.L 19 vjeç, ka qenë duke kryer manovra të rrezikshme me automjet në afërsi të shkollës, duke rrezikuar edhe nxënësit e tjerë.
Pas verifikimeve të kryera me drogëtestues, ky shtetas rezultoi nën efektin e lëndëve droguese “Cocaine”, si dhe i pa paisur me leje drejtimi.
Sa më sipër, u bë menjëherë kapja në flagrancë dhe arrestim i drejtuesit të automjetit si i dyshuar për veprën penale “Drejtim mjeti në mënyrë të parregullt”, parashikuar nga neni 291 i Kodit Penal të Republikës së Shqipërisë.
