Patos – Ura u rindërtua, por një kilometër rrugë mbetet plagë e hapur për banorët

Një kontrast i hidhur për banorët e disa fshatrave të bashkisë Patos: ura që rrezikonte shembjen u rindërtua, por vetëm një kilometër rrugë vijon të mbetet e harruar. Dhe për këtë, banorët thonë me ironi se duhet të presin zgjedhjet e ardhshme.

Segmenti prej rreth 1 km, që lidh Sheqishten, Belinën, Marinzën, Jagodinën e më tej me Roskovecin, është sot në gjendje të mjerueshme. Kanale të thelluara dhe gropa të shumta e kanë kthyer udhëtimin me automjete në një aventurë të rrezikshme. Drejtuesit e makinave detyrohen të lëvizin majtas e djathtas për të shmangur dëmtimet, shpesh duke rrezikuar aksidente.

“Ura u bë para zgjedhjeve, por rruga mbeti po aty. Do presim zgjedhjet e tjera, ndoshta atëherë kujtohen edhe për këtë kilometër”, shprehen banorët me zhgënjim.

Rruga, e ndërtuar në fillim të viteve 2010, ka një rol jetik pasi lidh mbi 10 fshatra të Patosit e Rroskovecit me tregjet e Fierit, ku fermerët nxjerrin prodhimet e tyre bujqësore. Por që nga ndërtimi e deri më sot, nuk është kryer asnjë riparim apo mirëmbajtje.

Banorët thonë se dëmtimet më të mëdha i kanë shkaktuar automjetet e tonazhit të rëndë, por shtojnë se kjo nuk është arsye për ta lënë rrugën në harresë. Për ta, kjo është një plagë e hapur, që prej vitesh sjell aksidente, kosto më të larta për transportin e prodhimeve dhe vështirësi të mëdha në lëvizjen e përditshme.

“Ne nuk duam më premtime, por vepra konkrete”, theksojnë ata, duke shtuar se institucionet vendore nuk kanë dhënë asnjë përgjigje.

Ndërkohë, Bashkia Patos vijon të qëndrojë në heshtje për këtë problem disa vjeçar.