Policia dhe BKH “blindojnë” Elbasanin, në kërkim të Suel Çelës
Forca të shumta policie dhe agjentë të BKH kanë “zbarkuar” mëngjesin e kësaj të marte në qytetin e Elbasanit, për kapjen e një prej personave më të kërkuar nga drejtësia, Suel Çelës.
Burime për mediat bëjnë me dije se efektivët kanë shkuar në tregun e fruta-perimeve, i cili është në pronësi të babait të Suel Çelës, Petrit Çelës dhe në shtëpinë e tij për kontrolle. Deri më tani lidhur me këtë aksion policore nuk ka asnjë njoftim zyrtar.
Theksojmë se prej majit të vitit të kaluar, Çela u shpall në kërkim pas dëshmisë së të penduarit të drejtësisë, Nuredin Dumani. Sipas SPAK Çela ka porositur vrasjen e biznesmenit Lulzim Masha pranë liqenit artificial. Lidhur me këtë atentat, Policia e kryeqytetit arrestoi në muajin janar shtetasin Skerdi Tasi, i cili dyshohej si vrasës me pagesë në këtë rast.
Kujtojmë se atentati ndaj administratorit Lulzim Masha ndodhi në 18 janar 2022, ku një person qëlloi me armë zjarri ndaj makinës së tij.
Lidhur me ngjarjen u arrestua 31-vjeçari Skerdi Tasi, i cili u akuzua për “Vrasje me paramendim” e mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit.
