Policia e Fierit: Arrestime për drogë, lojëra fati dhe drejtim mjeti në gjendje të dehur
Drejtoria Vendore e Policisë Fier ka ndërmarrë një sërë aksionesh në kuadër të luftës kundër krimit, që kanë çuar në arrestimin e disa personave dhe nisjen e procedimeve penale për të tjerë.
Sektori për Hetimin e Narkotikëve arrestoi shtetasin A. Sh., 23 vjeç, banues në fshatin Plyk, pasi gjatë kontrollit fizik iu gjet dhe iu sekuestrua një sasi lënde narkotike e dyshuar si cannabis sativa.
Sektori për Hetimin e Krimeve Ekonomiko-Financiare arrestoi shtetasin E. Rr., 37 vjeç, banues në Fier, pasi nga këqyrja e celularit të tij u zbuluan faqe që ofronin lojëra fati, si dhe foto të biletave sportive të paligjshme.
Policia Rrugore arrestoi shtetasin D. Gj., 54 vjeç, banues në Lushnjë, pasi u kap duke drejtuar automjetin në gjendje të dehur.
Ndërkohë, Komisariati i Policisë Fier nisi procedimin penal për shtetasin L. G., 38 vjeç, banues në fshatin Daullas, i cili nuk iu bind urdhrit të Policisë për të ndaluar automjetin.
Komisariati i Policisë Lushnjë gjithashtu referoi materialet në Prokurori për procedimin penal të shtetasve M. Ç., 36 vjeç, banues në fshatin Bubullimë, për ushtrim dhune ndaj bashkëshortes, dhe K. S., 31 vjeç, banues në fshatin Plug, për ndërtim pa leje.
Materialet procedurale janë referuar në Prokurori për veprime të mëtejshme.
