Policia e Tiranës paralajmëron për skemë mashtrimi me mesazhe të rreme nga “Meta Platforms”. Qytetarët këshillohen të mos reagojnë ndaj këtyre mesazheve.
Policia Vendore e Tiranës ka zbuluar një skemë të re mashtrimi në rrjet, ku qytetarëve u dërgohen mesazhe që pretendojnë të jenë nga kompania Meta Platforms. Mesazhet kërkojnë verifikimin e llogarive në Facebook, duke kërcënuar me mbylljen e tyre nëse nuk kryhet konfirmimi.
Sipas Sektorit për Hetimin e Krimeve Kibernetike, qëllimi i këtyre mesazheve është marrja e padrejtë e kontrollit të llogarive të përdoruesve përmes linqeve mashtruese. Qytetarët këshillohen të mos reagojnë ndaj këtyre mesazheve dhe të raportojnë rastet pranë autoriteteve.
Njoftim i DVP Tiranë:
Sektori për Hetimin e Krimeve Kibernetike në DVP Tiranë gjatë monitorimit të vazhdueshëm të burimeve të hapura të informacionit dhe platformave virtuale, me qëllim evidentimin e veprimtarive të kundraligjshme kryesisht në fushën e krimeve kibernetike, ka konstatuar mesazhe të maskuara si ato të kompanisë Meta Platforms, drejt numrave të telefonit, për konfirmimin e të dhënave në rrjetin social Facebook, të lidhura me shërbimin Facebook Ads, (por jo vetëm).
Në këto mesazhe pretendohet verifikimi i llogarive në Facebook ose në të kundërt, llogaria do të mbyllet.
Mesazhet mashtruese kanë si synim orientimin e poseduesve të llogarive drejt linqeve mashtruese me qëllim marrjen në posedim të llogarive tëpersonave të mashtruar, në menyrë të padrejtë.
Sektori për Hetimin e Krimeve Kibernetike në DVP Tiranë bën thirrje që nqs jeni ose dyshoni se mund të jeni i prekur nga dërgimi i këtyre mesazheve, të paraqiteni pranë zyrave tona, si dhe këshillon që të mos kryeni asnjë veprim kundrejt këtyre mesazheve, të cilat mund të vijnë nga numra kryesisht të huaj.
