POLICIA PEZULLON 5 PUNONJËS PAS PAMJEVE TË 19-VJEÇARIT TË PLAGOSUR NË PROTESTË, NISIN HETIMET
Policia e Shtetit ka pezulluar nga detyra katër punonjës policie dhe shefin e Rendit në Komisariatin Nr. 1, pas publikimit të pamjeve ku shfaqet 19-vjeçari L. B., i dëmtuar në këmbë, teksa shoqërohet nga efektivët pranë Parlamentit për t’u dërguar në spital.
Sipas njoftimit zyrtar, Drejtoria e Standardeve Profesionale ka nisur hetimin disiplinor ndaj pesë punonjësve, ndërsa një grup i posaçëm do të verifikojë veprimet e policisë gjatë protestës dhe zbatimin e procedurave standarde.
Paralelisht, Agjencia e Mbikëqyrjes Policore, në bashkëpunim me Prokurorinë, ka nisur hetimet për rastin.
Policia thekson se çdo punonjës që ka shkelur procedurat ose ka tejkaluar kompetencat do të mbajë përgjegjësi.
Në reagimin e saj, Policia e Shtetit dënon gjithashtu aktet e dhunës, dëmtimin dhe djegien e pronës gjatë protestës, duke u bërë thirrje qytetarëve të distancohen nga personat e dhunshëm.
