Pranga policëve dhe doganierit/ Han i Hotit, 4 të ndaluar nga AMP. Lejuan kanabis drejt Malit të Zi
Tre punonjës policie dhe një doganier në piken e kalimit kufitar të Hanit te Hotit janë vënë në pranga me akuzën e shpërdorimit të detyrës.
Operacioni u realizua nga agjencia e mbikëqyrjes policore, ndërsa aksioni erdhi pas një hetimi të thelluar dhe disa muajsh pune që përfshin dhe doganën e prokurorinë e Shkodrës.
Përmes këtij hetimi është arritur të provohet se këta punonjës të cilët shërbenin në piken e kalimit kufitar Hani i Hotit kanë lejuar kalimin e një kamioni drejt Malit te Zi me disa qindra kilogramë kanabis. Konkretisht, individët e ndaluar janë:
Leke Çekrezi, Fatjon Hamzi dhe Tonin Melaj. Të tre punonjës policie kufitare dhe Selami Ethemi me detyrë doganier.
Ky aksion lidhet me ngjarjen e 17 shtatorit 2023, kur një kamion me targa shqiptare, pas daljes nga Republika e Shqipërisë përmes pikës kufitare “Hani i Hotit”, është ndaluar në kufirin malazez, “Bozaj”.
Gjatë kontrollit të kamionit, autoritetet malazeze zbuluan një sasi të konsiderueshme prej 442 kilogramësh lëndë narkotike të dyshuar si “Cannabis Sativa”.
