PS çel zyrtarisht fushatën për zgjedhjet e brendshme, Asamble Kombëtare në Durrës më 21 mars
Ditën e shtunë, më 21 mars, nga ora 10:00 deri në 15:00, Partia Socialiste e Shqipërisë do të mbledhë Asamblenë Kombëtare në Durrës, duke shënuar çeljen zyrtare të fushatës për zgjedhjen e kryetarëve të rinj në çdo organizatë të saj vendore.
Fjalën kryesore do ta mbajë kryeministri Edi Rama, ndërsa në këtë takim pritet të flasin edhe drejtuesit politikë të qarqeve.
Viti 2026 është një vit zgjedhor brenda strukturave të PS-së, në përputhje me statutin e saj, i cili parashikon rinovimin e organizatave lokale çdo dy vjet. Procesi do të nisë me zgjedhjen e kryetarëve të organizatave dhe më pas do të vijojë me përzgjedhjen e forumeve lokale në të gjithë vendin.
Ky proces do të përfshijë të gjitha strukturat dhe të zgjedhurit e Partisë Socialiste, duke u shtrirë në çdo qelizë të saj. Ndërkohë, zgjedhjet për forumet drejtuese qendrore, si Kongresi, Asambleja apo Kryesia, nuk janë pjesë e këtij cikli.
Fushata për zgjedhjet e brendshme pritet të përmbyllet më 12 qershor, datë që përkon edhe me 35-vjetorin e themelimit të Partisë Socialiste.
Kujtojmë se hapja e kësaj fushate u paralajmërua nga kryeministri më 3 mars, gjatë një mbledhjeje ku ai theksoi nevojën për një dialog më të thelluar me bazën.
Tre ishin porositë kryesore të Edi Rama për strukturat socialiste:
- Shtrirja e dialogut me bazën dhe fokus i shtuar në bashki të caktuara
- Forcimi i bashkëpunimit me anëtarësinë
- Përgatitja për pasojat ekonomike të mundshme nga zhvillimet në Lindjen e Mesme
Ky proces konsiderohet një test i rëndësishëm për organizimin dhe mobilizimin e PS-së në nivel lokal.
