Pylos/ Arrestohet 25-vjeçari shqiptar, sulmoi berberin me shkop metalik dhe i dëmtoi makinën
Një 25-vjeçar shqiptar është arrestuar në qytetin e Pylosit, në Greqi, pasi dyshohet se ka sulmuar fizikisht një berber dhe i ka dëmtuar automjetin.
Sipas njoftimit zyrtar të policisë greke, ngjarja ka ndodhur pasditen e 7 shkurtit. Fillimisht, i riu ishte paraqitur si klient në një berberhane, ku ishte qethur nga pronari i saj, një 51-vjeçar.
Më pas, për arsye ende të paqarta, 25-vjeçari është rikthyer në ambientet e berberhanes i pajisur me një shkop metalik të palosshëm. Autoritetet bëjnë me dije se ai fillimisht ka ofenduar verbalisht berberin dhe më pas e ka goditur me shkop, duke i shkaktuar lëndime trupore.
Po ashtu, i riu dyshohet se ka dëmtuar edhe automjetin në pronësi të 51-vjeçarit. Policia greke ka ndërhyrë duke arrestuar autorin, ndërsa ndaj tij pritet të ngrihen akuza për dhunë dhe shkatërrim prone.
