Roskovec – Në ambientet e Bashkisë u zhvillua Edicioni i V-të i Çmimeve “Aristidh Kola”, organizuar nga Unioni i Gazetarëve
Në ambientet e Bashkisë Roskovec u zhvillua Edicioni i V-të i Çmimeve “Aristidh Kola”, një aktivitet i rëndësishëm kulturor dhe mediatik, i organizuar nga Unioni i Gazetarëve të Shqipërisë, me pjesëmarrjen e shumë figurave të njohura të gazetarisë dhe përfaqësues të mediave të ndryshme në vend.
Ky edicion, i cili mbante emrin e studiuesit dhe publicistit të njohur Aristidh Kola, u përqendrua në nderimin e kontributit të gazetarëve në shërbim të informacionit të paanshëm dhe profesional, si dhe në promovimin e vlerave kulturore e turistike të qytetit të Roskovecit.
Në kuadër të aktivitetit, Unioni i Gazetarëve ndau certifikata vlerësimi për disa nga emrat më të njohur të gazetarisë, si:
- Znj. Majlinda Bufi
- Znj. Mimoza Marjanaku
- Z. Mentor Kikia
- Portali FieriWeb.com
- Z. Agron Goga,
si dhe për përfaqësues të tjerë që kanë dhënë një kontribut të vazhdueshëm në fushën e medias.
Kryetarja e Bashkisë Roskovec, Majlinda Bufi, në një postim të saj në rrjetet sociale, përshëndeti organizimin e këtij eventi në ambientet e bashkisë, duke vlerësuar rolin e medias dhe rëndësinë e nismave të tilla për komunitetin lokal.
“Ishte kënaqësi të mirëprisnim në Roskovec Edicionin e V-të të Çmimeve ‘Aristidh Kola’, një aktivitet që nderon figurat e fjalës së lirë dhe promovon vlerat tona kulturore. Falënderoj Unionin e Gazetarëve për organizimin dinjitoz dhe të gjithë gazetarët që me përkushtim e profesionalizëm i shërbejnë të vërtetës. Bashkia Roskovec do të mbetet gjithmonë një derë e hapur për çdo nismë që i shërben shoqërisë,” – u shpreh znj. Bufi.
Ky aktivitet i përvitshëm po kthehet tashmë në një traditë që përçon vlerësim dhe respekt për median e lirë dhe angazhohet në afrimin e institucioneve vendore me komunitetin gazetaresk.
