Roskoveci bëhet kryeqyteti i artit rom: “Roma Romale 2025” mbledh 100 artistë nga gjithë Shqipëria
Më 11 dhe 12 prill, Roskoveci do të shndërrohet në epiqendrën e kulturës rome me festivalin “Roma Romale 2025”, një ngjarje e veçantë që synon të ruajë dhe promovojë trashëgiminë e pasur të këtij komuniteti. Nën kujdesin e kryetares së Bashkisë Roskovec, Majlinda Bufi, festivali do të sjellë në skenë 10 grupe artistësh nga qytete të ndryshme si Tirana, Durrësi, Lezha, Mati, Lushnja, Delvina, Erseka, Fieri dhe Roskoveci.
Pjesëmarrës nderi i festivalit do të jetë një grup artistik nga Maqedonia e Veriut, i drejtuar nga Ermina Redjepova, një emër i njohur në skenën rome të rajonit.
Në ditën e parë të festivalit do të zhvillohet një tryezë diskutimi me temën “Çështja rome në perspektivën e pushtetit lokal”, ku do të marrin pjesë personalitete nga Kosova si:
• Habit Hajredini (Drejtor i Zyrës për Qeverisje të Mirë, pranë Zyrës së Kryeministrit Albin Kurti)
• Shaqir Totaj (Kryetar i Komunës së Prizrenit)
• Bali Muharremaj (Kryetar i Komunës së Suharekës)
• Adriatik Hasantari (Drejtor Ekzekutiv i organizatës Roma Active Albania)
Dita e dytë do të nisë me një takim miqësor mes Kryetares Bufi dhe artistëve pjesëmarrës, për të kulmuar në mbrëmje me një koncert spektakolar në sheshin “Bazar”. Ky event do të sjellë një atmosferë unike me muzikë, kërcime dhe veshje tradicionale rome, duke u bërë një festë e gjallë për të gjithë qytetarët.
Festivali do të moderohet nga dy emra të njohur të skenës shqiptare, Sokol Guga dhe Silvana Braçe, të cilët do të sjellin profesionalizëm dhe energji në këtë ngjarje të rëndësishme.
“Roma Romale 2025” nuk është thjesht një festë – është një urë miqësie, një platformë për dialog dhe një dëshmi e gjallë e vlerave që komuniteti rom sjell në shoqërinë shqiptare.
