Rrëmbimi i tre policëve/ Kosova ndalon hyrjen e mallrave të Serbisë
Qeveria e Kosovës ka vendosur që të pezullojë shkëmbimet tregtare me Serbinë. Ky është informacioni i fundit sipas burimeve të mediave serbe.
Gazetari Arlind Isa raportoi nga Prishtina, ku deklaroi se ky informacion nuk konfirmohet dhe nuk po zyrtarizohet ende nga institucionet zyrtare dhe qeveria e Kosovës.
Njoftohet se në të gjitha pikat doganore ku Kosova ka komunikim me Serbinë, është dhënë urdhri që të bllokohet dhe të ndalohet hyrja e mallrave serbe.
Policia e Kosovës tha më herët se tre zyrtarë të saj policorë dyshohet se janë rrëmbyer nga trupat serbe “thellë brenda territorit të Kosovës”, në afërsi të vijës kufitare në komunën e Leposaviçit.
Sipas kryeministrit të Kosovës, Albin Kurti, vendi i quajtur Tresave/Bare – ku dyshohet se janë rrëmbyer policët – gjendet 300 metra në brendësi të territorit të Kosovës.
