Rruga e re Roskovec–Lushnjë, 22 kilometra e gjatë: Ja si do të ndërtohet aksi i ri
ROSKOVEC–LUSHNJË – Autoriteti Rrugor Shqiptar ka shpallur kompaninë “KLODIODA” fituese të tenderit për studimin dhe projektimin e aksit të ri rrugor Roskovec–Lushnjë, një projekt i rëndësishëm infrastrukturor që parashikon ndërtimin e një rruge krejtësisht të re me gjatësi të përafërt prej 22 kilometrash.
Oferta e kompanisë fituese është 21 milionë lekë, ndërsa fondi limit i përcaktuar për procedurën ishte rreth 24 milionë lekë. Tenderi për studimin dhe projektimin u hap nga ARRSH gjatë muajit qershor.
Sipas termave të referencës, traseja e re do të nisë në afërsi të Roskovecit, në aksin Poshnjë–Roskovec–Fier, dhe do të vijojë në drejtim të Lushnjës, ku do të lidhet me rrugën Berat–Lushnjë.
Ura e re mbi lumin Seman
Një nga elementët më të rëndësishëm të projektit është ndërtimi i një ure të re mbi lumin Seman, e cila do të mundësojë lidhjen rrugore mes territoreve të bashkive Roskovec dhe Lushnjë.
Përpara përcaktimit të trasesë përfundimtare, kompania projektuese duhet të studiojë të paktën dy variante alternative, duke analizuar zgjidhjen më të përshtatshme për ndërtimin e aksit të ri.
Rruga është parashikuar të projektohet si rrugë ndërurbane dytësore, e kategorisë C3.
Projekti përfshin edhe nyjet dhe rrugët lidhëse
Studimi nuk do të përqendrohet vetëm te ndërtimi i rrugës kryesore. Projekti do të përfshijë edhe nyjet lidhëse, rrugët dytësore dhe akseset për komunitetet përgjatë trasesë, si dhe elementët e sigurisë dhe sistemimit të aksit.
Në projekt parashikohen gjithashtu sinjalistika rrugore, ndriçimi, gjelbërimi dhe ndërhyrjet e nevojshme për garantimin e një qarkullimi sa më të sigurt.
Sipas ARRSH-së, ndërtimi i këtij aksi të ri synon të krijojë një lidhje më të shpejtë dhe më të sigurt mes Roskovecit dhe Lushnjës, duke shmangur kalimin e trafikut në qendrat e banuara.
Rruga pritet të ndikojë në uljen e ngarkesës së trafikut në zonat urbane, përmirësimin e sigurisë rrugore dhe shkurtimin e lidhjes mes dy qyteteve, ndërsa pritet të krijojë edhe akses më të mirë për banorët dhe zonat përgjatë trasesë.
E rëndësishme: Në këtë fazë nuk është tenderuar ende ndërtimi i rrugës. Kompania “KLODIODA” është shpallur fituese për studimin dhe projektimin. Pas përfundimit dhe miratimit të projektit, do të duhet të zhvillohet një procedurë tjetër për ndërtimin e aksit të ri Roskovec–Lushnjë.
