Sanduiçet e famshme të “LALIT” lindën në Fier – Si e ndërtoi Mateo ëndrrën shqiptare
Fier, 10 Korrik 2025 – Pas shumë vitesh emigrimi në Greqi, Mateo Hatija është rikthyer në qytetin e tij të lindjes, Fier, duke ndërtuar një histori suksesi që frymëzon të rinjtë shqiptarë.
Mateo emigroi në moshën 9-vjeçare së bashku me familjen e tij, ku u arsimua dhe punoi për vite me radhë si guzhinier në disa prej restoranteve më të njohura në shtetin fqinj. Eksperienca dhe pasioni për kuzhinën e shtynë që, pas kthimit në atdhe, të hapte biznesin e tij të parë në Fier me emrin “Capricciosa LALI”, një piceri dhe fast-food që shumë shpejt fitoi zemrat e qytetarëve dhe udhëtarëve që ndaleshin në zonën e Sheqit të Madh për të shijuar sanduiçët e famshëm të Lalit.
Pas suksesit në Fier, Mateo zgjeroi aktivitetin e tij edhe në Tiranë, ndërsa më vonë krijoi një linjë moderne për prodhimin e sallameve dhe proshutave me markën “Lali Food”, duke u kthyer në një emër të njohur në industrinë ushqimore.
Sot, Mateo Hatija është pronar i tre bizneseve, me një staf prej 25 punonjësish, të cilët i konsideron si pjesë të familjes. Ai është shembulli konkret se dashuria për atdheun, përkushtimi dhe puna me pasion mund të sjellin sukses edhe në Shqipëri.
“U bëj thirrje të gjithë të rinjve të mos e braktisin vendin. Shqipëria ka potencial. Me punë dhe vullnet, mund të arrini gjithçka këtu,” – thotë Mateo me bindje.
