Stuhi e fuqishme godet Britaninë dhe Irlandën, mbyllen shkollat dhe anulohen dhjetëra fluturime
Britania e Madhe dhe Irlanda po përgatiten për një ndërprerje të gjerë të udhëtimeve, me disa fluturime dhe shërbime treni tashmë të anuluara dhe shumë shkolla të mbyllura sot për shkak të stuhisë së fuqishme “Eowyn”.
Miliona njerëz janë këshilluar të qëndrojnë në shtëpi dhe të shmangin udhëtimet ndërsa stuhia Eowyn po kalon në Britani.
Masat vijnë pasi agjencia e motit në Mbretërinë e Bashkuar lëshoi një paralajmërim të rrallë të me kod të kuq për erën që po paraqet “rrezik për jetën” në Irlandën e Veriut dhe pjesë të Skocisë.
Irlanda e Veriut dhe pjesë të Skocisë aktualisht po përjetojnë pengesa të konsiderueshme, me erëra deri në 161 kilometra në orë të parashikuara në disa zona bregdetare.
Dhjetra shkolla janë mbyllur sot në gjithë Mbretërinë e Bashkuar, duke përfshirë të gjitha shkollat në Glasgow dhe Edinburg. Më shumë se 30 fluturime janë anuluar në Aeroportin Heathrow të Londrës, ndërsa 28 janë pezulluar në Edinburg.
Stuhia shkaktoi gjithashtu anulimin e 18 fluturimeve në Aeroportin e Glasgowit dhe 14 në Aeroportin e Qytetit “George Best” në Belfast.
Shërbimi Kombëtar i Hekurudhave paralajmëroi njerëzit për ndërprerje, duke këshilluar udhëtarët që të mos udhëtojnë nëpër Skoci dhe shumë pjesë të Anglisë veriore.
Irlanda po përballet gjithashtu me një nga stuhitë e saj “më të rënda” në histori, me autoritetet irlandeze që kanë lëshuar paralajmërime me kod të kuq në gjithë vendin për shkak të erës së fortë.
Ndërkohë, agjencia irlandeze e motit raportoi erëra rekord deri në 183 kilometra në orë në qarkun Galway në orët e mëngjesit, shpejtësia më e lartë e erërave e regjistruar ndonjëherë në vend.
Aktualisht, rreth 560.000 objekte në gjithë vendin janë pa energji elektrike. Shumë udhëtime janë ndërprerë në Irlandë, ndërsa stuhia detyroi anulimin e më shumë se 30 fluturimeve në Aeroportin e Dublinit.
