“Të bëjë shqiponjën mbi zemër”/ Dëshira e babait shqiptar që humbi të birin në Greqi: Dua që zemra e djalit tim të dhurohet
Lule dhe letra me mesazhe kanë lënë në bregun e lumit Arahtho të Artës shokët e dy fëmijëve që janë nxjerrë pa ndjenja nga uji para dy ditësh dhe ndodheshin në gjendje kritike për jetën.
“Do ju kujtojmë gjithnjë, ikët si heronj. Shoqëria”, thuhet në to.
Megjithë përpjekjet e mjekëve në spitalin e Rios në Patra, Spiros dhe Kleoni mesditën e së premtes, nuk ja dolën dhe u konsideruan të vdekur klinikisht.
Menjëherë, në fillim prindërit e 14-vjeçarit grek Spyros kanë vendosur të dhurojnë organet e fëmijës fatkeq, dhe më pas edhe prindërit shqiptarë të Kleonit, një akt që i ka dhënë kësaj ngjarje nota të tjera humane.
“Falenderoj shtetin grek, doktorët e gjithë Greqisë që bënë të pamundurën për djalin tim. Djali imi iku nga kjo jetë , e morri Zoti, por zemra e tij mbeti në Greqi t’i dhurohet një fëmije tjetër e ti shtojë jetën që do bënte djali im”, babai i Kleonit.
“Falenderoj shtetin grek. Gjithë mjekët bënë të pamundurën, por nuk e shpëtuan dot. Ju faleminderit shumë”, deklaroi nëna e Kleonit.
Para kamerave nuk ka mbajtur dot ngashërimin edhe drejtori i reanimacionit që luftoi bashkë me kolegët e tij për 48 orë që të mbanin në jetë dy fëmijët.
Andreas Iliadhis drejtor i Reanimacionit spitali Rio: Kleoni i vogël dhe Spiros, së bashku, aty pranë tek shtretërit e reanimacionit, sot hapin flatrat e tyre. Hapin flatrat dhe japin jetë tek shumë fëmijë të tjerë. Përfundimisht zemrat… nuk kanë ngjyrë.
Duke i kërkuar ndjesë prindërve të 14-vjecarit grek Spiros, që u hodh në ujë për të shpëtuar 12-vjecarin shqiptar, babai i Kleonit ka shprehur edhe një dëshirë tjetër.
“Kur të vijë dita që të mësoj se kush e morri zemrën e djalit tim , le të bëjë tek zemra shqiponjën e Shqipërisë. Ju faleminderit jam shumë i pikëlluar nuk mund të flas më“, u shpreh babai i Kleonit.
Dhe ka falenderuar edhe emigrantin shqiptar Letian Gega që është zhytur në ujërat e thella të lumit për t’i nxjerrë fëmijët që i kishte marrë rryma.
“Falenderoj Leon nga Berati që u mundua të shpëtonte jetën e djalit tim megjithëse Zoti e morri se e donte për vete”, vijoi më tej i ati i të vogëlushit.
Megjithë fundin tragjik të kësaj ngjarjeje, ishte hera e pare që në mediat greke ju dha një vend kaq i madh veprimit heroik të emigrant shqiptar që u hodh në lumë për të shpëtuar dy fëmijët, por edhe dhurimit të organeve nga prindërit shqiptarë të Kleonit të vogël.
