Tension në Ballsh / Përplasje fizike në ndeshjen Bylis – Oriku, ndërhyn Policia
Situata është përshkallëzuar pasditen e sotme në stadiumin “Adush Muçaj” në qytetin e Ballshit, gjatë zhvillimit të ndeshjes mes Bylisit dhe Orikut, ku janë regjistruar përplasje fizike mes lojtarëve dhe tifozëve.
Sipas informacioneve nga vendngjarja, tensionet kanë nisur fillimisht në fushën e lojës, për t’u përshkallëzuar më pas në konfrontime të drejtpërdrejta si në fushë, ashtu edhe në shkallët e stadiumit.
Për një moment, situata ka dalë jashtë kontrollit, duke bërë të nevojshme ndërhyrjen e forcave të Policisë për të rivendosur rendin dhe qetësinë.
Gjatë incidentit është shoqëruar në ambientet e Policisë futbollisti Bruno Telushi, ndërsa ende nuk janë bërë të ditura rrethanat e plota të përfshirjes së tij në këtë ngjarje.
Autoritetet po punojnë për zbardhjen e plotë të incidentit, ndërsa pritet një reagim zyrtar lidhur me shkaqet dhe masat që do të merren ndaj personave të përfshirë.
