Tentuan të vrisnin për hakmarrje një person në Patos, dënohen me 20 vite burg dy autorët
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Fier, janë shpallur fajtorë dhe dënuar me 20 vite burg secili shtetasit V.D. alias L. dhe A.G., për veprat penale “Vrasja me paramendim” e mbetur në tentativë, kryer në bashkëpunim, si dhe “Mbajtja pa leje e armëve dhe municionit”.
Sipas hetimeve të kryera në kuadër të procedimit penal nr. 1795 të vitit 2019, rezulton se i pandehuri V.D. alias L., me qëllim hakmarrjeje për vrasjen e vëllait të tij G.L., ka bashkëpunuar me shtetasin A.G. për të vrarë shtetasin A.H.
Ngjarja ka ndodhur më 30 dhjetor 2019, rreth orës 17:50, në vendin e quajtur “Dukas-Breg” në Patos. Sipas Prokurorisë, pasi u sigurua për identitetin e shënjestrës, A.G. iu afrua dhe qëlloi tre herë me armë zjarri në drejtim të A.H.
Si pasojë e të shtënave, A.H. mbeti i plagosur në krahun e majtë, por arriti t’i shpëtojë sulmit.
Prokuroria e Fierit thekson se do të vijojë angazhimin për ndëshkimin e çdo personi që kryen vepra penale kundër jetës dhe shëndetit të qytetarëve
